మహిళల ఆసియా కప్ ఛాంపియన్గా భారత్
ఫైనల్లో శ్రీలంకను చిత్తు చేసి టైటిల్ కైవసం
దుబాయ్, సెప్టెంబర్13:
మహిళల ఆసియా కప్ 2026 ఫైనల్లో భారత మహిళల జట్టు సత్తా చాటింది. శ్రీలంకను ఏకంగా 72 పరుగుల తేడాతో ఓడించి ఆసియా కప్ టైటిల్ను కైవసం చేసుకుంది. ఈ విజయంతో భారత మహిళల జట్టు ఆసియా కప్ చరిత్రలో 8వసారి ఛాంపియన్గా నిలిచింది. బ్యాటింగ్లో ఓపెనర్లు షఫాలీ వర్మ, స్మృతి మంధన మెరుపు అర్ధశతకాలతో చెలరేగగా.. బంతితో యువ స్పిన్నర్ శ్రీ చరణి అద్భుత ప్రదర్శన చేసింది. టాస్ గెలిచిన భారత్ తొలుత బ్యాటింగ్ ఎంచుకుంది. ఓపెనర్లు షఫాలీ వర్మ, స్మృతి మంధన శ్రీలంక బౌలర్లపై విరుచుకుపడ్డారు. ఆరంభం నుంచే దూకుడుగా ఆడిన ఈ జోడీ కేవలం 12.5 ఓవర్లలో 129 పరుగుల భారీ భాగస్వామ్యాన్ని నెలకొల్పింది. దీంతో భారత్ భారీ స్కోరుకు బలమైన పునాది పడింది. షఫాలీ వర్మ కేవలం 39 బంతుల్లోనే 9 ఫోర్లు, 2 సిక్సర్ల సాయంతో 68 పరుగులు చేసింది. మరోవైపు స్మృతి మంధన 39 బంతుల్లో 5 ఫోర్లు, 3 సిక్సర్లతో 59 పరుగులు సాధించింది. వీరిద్దరూ అర్ధశతకాలతో మెరవడంతో భారత్ స్కోరు వేగంగా పెరిగింది. అనంతరం వచ్చిన బ్యాటర్లు ఆశించిన స్థాయిలో వేగం చూపించలేకపోయినా.. చివర్లో కమలిని 5 బంతుల్లోనే ఒక ఫోర్, ఒక సిక్సర్తో 15 పరుగులు చేసి స్కోరుకు మరింత ఊపు తీసుకొచ్చింది. దీంతో భారత జట్టు నిర్ణీత 20 ఓవర్లలో 5 వికెట్ల నష్టానికి 183 పరుగులు చేసింది.
శ్రీలంక బ్యాటింగ్ కుప్పకూల్చిన బౌలర్లు 184 పరుగుల భారీ లక్ష్యంతో బరిలోకి దిగిన శ్రీలంకకు భారత బౌలర్లు ఎక్కడా అవకాశం ఇవ్వలేదు. కట్టుదిట్టమైన బౌలింగ్తో లంక బ్యాటర్లను ఒత్తిడిలోకి నెట్టారు. కెప్టెన్ చమరి అటపట్టు 36 పరుగులతో కాసేపు పోరాడినా.. ఆమె వికెట్ కోల్పోయిన తర్వాత శ్రీలంక ఇన్నింగ్స్ పూర్తిగా గాడి తప్పింది. యువ స్పిన్నర్ శ్రీ చరణి తన అద్భుత బౌలింగ్తో లంక బ్యాటింగ్ ఆర్డర్ను దెబ్బతీసింది. హర్షిత, నీలాక్షిక, కవిష, సుగందిక వికెట్లను పడగొట్టి శ్రీలంకను కోలుకోలేని స్థితిలోకి నెట్టింది. శ్రీ చరణి 20 పరుగులు మాత్రమే ఇచ్చి 4 వికెట్లు పడగొట్టగా.. సీనియర్ ఆల్రౌండర్ దీప్తి శర్మ 3 వికెట్లతో ఆమెకు చక్కటి సహకారం అందించింది. భారత బౌలర్ల ధాటికి శ్రీలంక జట్టు నిర్ణీత 20 ఓవర్లు కూడా పూర్తిగా ఆడలేక 111 పరుగులకే ఆలౌట్ అయింది. దీంతో భారత్ 72 పరుగుల భారీ విజయాన్ని నమోదు చేసింది. ఈ విజయంతో భారత మహిళల జట్టు ఆసియా కప్లో తన ఆధిపత్యాన్ని మరోసారి చాటుకుంది. ఇప్పటివరకు భారత్ మొత్తం 8 సార్లు ఆసియా కప్ టైటిల్ను గెలుచుకుంది. ఇందులో వన్డే ఫార్మాట్లో 4 సార్లు, టీ20 ఫార్మాట్లో 4 సార్లు విజేతగా నిలిచింది. బ్యాటింగ్, బౌలింగ్లో సమష్టిగా రాణించిన భారత జట్టు.. ఫైనల్లో శ్రీలంకను చిత్తు చేసి మరోసారి ఆసియా ఛాంపియన్గా అవతరించింది.
