QuickToday Shorts

జ‌న‌గామ‌, అక్టోబర్ 19 (క్విక్ టుడే న్యూస్‌):

శ్రీ ఉప్పలమ్మ దేవి ఆలయంలో నిర్వహిస్తున్న శ్రీదేవి దుర్గాభవాని శరన్నవరాత్రి ఉత్సవాల్లో భాగంగా సోమవారం చండీ హోమం, పూర్ణాహుతి కార్యక్రమాన్ని భక్తిశ్రద్ధలతో నిర్వహించారు. ఈ కార్యక్రమానికి జనగామ జిల్లా డీసీపీ రాజమహేంద్ర నాయక్ ఐపీఎస్ హాజరై ప్రత్యేక పూజల్లో పాల్గొని అమ్మవారి ఆశీస్సులు పొందారు. ఈ సందర్భంగా ఆలయంలో ఆధ్యాత్మిక వాతావరణం నెలకొంది. కార్యక్రమంలో ఆలయ అర్చకులు పవన్ శర్మ, శ్రీ ఉప్పలమ్మ దేవాలయం కమిటీ సభ్యులు పాల్గొన్నారు.

జ‌న‌గామ‌, అక్టోబర్ 18 (క్విక్ టుడే న్యూస్‌):

జనగామ మండలం వడ్లకొండ గ్రామంలో కురుమ సంఘం ఆధ్వర్యంలో గుర్రం బావి దగ్గర బతుకమ్మ వేడుకలు ఘనంగా జరిగాయి.ఈ సంబరాల్లో కురుమ కుల మహిళలు, యువతులు పెద్ద ఎత్తున పాల్గొన్నారు. తీరొక్క పూలతో అందంగా పేర్చిన బతుకమ్మల చుట్టూ తిరుగుతూ, సంప్రదాయ పాటలతో ఉత్సాహంగా ఆడిపాడారు. అనంతరం వాయినాలు ఇచ్చుకొని బతుకమ్మలను నిమజ్జనం చేశారు. పెద్ద కురుమ ఆధ్వర్యంలో పెద్ద బతుకమ్మలకు బహుమతులు ప్రదానం చేశారు ఈ కార్యక్రమంలో పెద్ద సంఖ్యలో కురుమ కుల ఆడపడుచులు , పెద్దకూర్మ, సంఘం అధ్యక్షుడు, మరియు కురుమ యువజన సంఘం సభ్యులు కురుమ సంఘం నాయకులు పాల్గొన్నారు.

జ‌న‌గామ‌, అక్టోబర్ 17 (క్విక్ టుడే న్యూస్‌):

జనగామ జిల్లా కేంద్రంలోని బీరప్పగడ్డలో మహారాణి దుర్గా మాయ ఆధ్వర్యంలో కళావృత్తి కార్యక్రమాన్ని ఘనంగా నిర్వహించారు. ఈ కార్యక్రమానికి జనగామ మున్సిపల్ చైర్మన్ కడకంచి బాలమణి శ్రీనివాస్ ముఖ్య అతిథిగా హాజరయ్యారు.ఈ సందర్భంగా కమిటీ సభ్యులు ముఖ్య అతిథికి శాలువా కప్పి.ఘనంగా సన్మానించారు. అనంతరం రాజేశ్వరాచారి అయ్యవార్లతో మంత్రోచ్ఛారణ చేయిస్తూ సంప్రదాయబద్ధంగా స్వాగతం పలికి ఆశీర్వాదాలు అందజేశారు.ఈ సందర్భంగా ముఖ్య అతిథి కడకంచి బాలమణి శ్రీనివాస్ మాట్లాడుతూ కళలు,సంప్రదాయాలను పరిరక్షిస్తూ కళాకారులను ప్రోత్సహించాల్సిన అవసరం ఉందన్నారు. ఇటువంటి కార్యక్రమాలు ప్రజల్లో సాంస్కృతిక చైతన్యాన్ని పెంపొందించడంతో పాటు మన.సంప్రదాయాలను భావితరాలకు అందించేందుకు దోహదపడతాయని పేర్కొన్నారు.కళాకారులను తీర్చిదిద్దడంలో గురువుల పాత్ర ఎంతో కీలకమని నిర్వాహకులు పేర్కొన్నారు. ప్రత్యేకంగా మైత్రేయ కూచిపూడి కళా క్షేత్రం గురువు సుకేష్ అందిస్తున్న శిక్షణ,కళాకారుల ప్రతిభను వెలికితీసేందుకు చేస్తున్న కృషిని అభినందించారు. కార్యక్రమంలో కమిటీ సభ్యులు, స్థానికులు, కళాకారులు, నిర్వాహకులు తదితరులు.పాల్గొన్నారు.

జ‌న‌గామ‌, అక్టోబర్ 16 (క్విక్ టుడే న్యూస్‌):
జనగామ మండలం చౌడారం గ్రామంలో గ్రామ సర్పంచ్ కర్ల పద్మ భార్గవ్ రామ్ రెడ్డి ఆధ్వర్యంలో పలు సేవా కార్యక్రమాలు ఘనంగా నిర్వహించబడ్డాయి. ఈ కార్యక్రమానికి ముఖ్య అతిథిగా కొమ్మూరి ప్రతాప్ రెడ్డి హాజరయ్యారు. స్థానిక ప్రజల సమక్షంలో మహిళలకు చీరల పంపిణీతో పాటు అర్హులకు సైకిళ్లను అందజేశారు. అలాగే, ఆడపిల్లల సంక్షేమాన్ని ప్రోత్సహించే లక్ష్యంతో గ్రామంలో నవజాత ఆడపిల్లలకు ఒక్కొక్కరికి ₹5,000 చొప్పున ఆర్థిక కానుకను అందజేశారు. ఈ సందర్భంగా సర్పంచ్ కర్ల పద్మ భార్గవ్ రామ్ రెడ్డి మాట్లాడుతూ.. ఆడపిల్లల సంక్షేమం, మహిళల అభివృద్ధి మరియు గ్రామ ప్రజల సేవే ధ్యేయంగా ఈ కార్యక్రమాన్ని చేపట్టినట్లు తెలిపారు. ఈ సేవా కార్యక్రమంలో పాల్గొని విజయవంతం చేసిన ప్రజాప్రతినిధులకు, నాయకులకు, కార్యకర్తలకు మరియు గ్రామస్తులకు నిర్వాహకులు ప్రత్యేక ధన్యవాదాలు తెలియజేశారు.

జ‌న‌గామ‌, అక్టోబర్ 09 (క్విక్ టుడే న్యూస్‌):

తెలంగాణ రాష్ట్ర ప్రభుత్వం ఉద్యోగుల కోసం నిర్వహించిన ఆల్ ఇండియా సివిల్ సర్వీసెస్ టోర్నమెంట్‌ రాష్ట్రస్థాయి సెలక్షన్ ట్రయల్స్‌లో జనగామ ఎక్సైజ్ శాఖ ఉద్యోగి ప్రథమ స్థానం సాధించి జాతీయస్థాయి క్రీడా పోటీలకు ఎంపికయ్యారు. ఈ నెల 7, 8 తేదీల్లో హైదరాబాద్‌లోని జింఖానా గ్రౌండ్‌లో నిర్వహించిన సెలక్షన్ ట్రయల్స్‌లో ఈ ఘనత సాధించారు. జాతీయస్థాయి పోటీలకు ఎంపిక కావడంతో జనగామ ఎక్సైజ్ స్టేషన్ ఎన్‌హెచ్‌బీఆర్‌జీ.శ్రీనివాసరావు, సబ్‌ ఇన్‌స్పెక్టర్‌ ఎం.డి.యూసఫ్‌తో పాటు సిబ్బంది జె. నర్సిరెడ్డి, రామనందన్ రెడ్డి అభినందనలు తెలిపారు. జాతీయస్థాయి పోటీల్లోనూ ప్రతిభ కనబరిచి విజయం సాధించాలని ఆకాంక్షించారు.

జ‌న‌గామ‌, అక్టోబర్ 09 (క్విక్ టుడే న్యూస్‌):

పట్టణంలోని బతుకమ్మ కుంటను సుందరంగా తీర్చిదిద్దేందుకు మున్సిపల్ చైర్‌పర్సన్ కడకంచి బాలమణి శ్రీనివాస్ ప్రత్యేక శ్రద్ధ తీసుకున్నారు. బతుకమ్మ కుంట పరిసరాలను పరిశుభ్రంగా ఉంచి, ప్రజలకు ఆహ్లాదకరమైన వాతావరణం కల్పించేలా చర్యలు చేపట్టాలని సూచించారు. ఈ సందర్భంగా బతుకమ్మ కుంట పరిసరాలను పరిశీలించిన మున్సిపల్ ఛైర్పర్సన్ పారిశుధ్య నిర్వహణ, పరిసరాల శుభ్రతపై ప్రత్యేక దృష్టి సారించాలని సంబంధిత సిబ్బందికి సూచించారు. బతుకమ్మ కుంటను పరిశుభ్రంగా, ఆకర్షణీయంగా ఉంచేందుకు నిరంతరం పర్యవేక్షణ చేపట్టాలని పేర్కొన్నారు. ఈ కార్యక్రమంలో కౌన్సిల్లర్లు, మున్సిపల్ కమిషనర్‌తో పాటు ఇతర సిబ్బంది పాల్గొన్నారు.

జ‌న‌గామ‌, అక్టోబర్ 08 (క్విక్ టుడే న్యూస్‌):
గానుగుపహడ్ అంగన్‌వాడీ కేంద్రం-1లో పోషణ మాసంలో భాగంగా అవగాహన సదస్సు నిర్వహించారు. ఈ కార్యక్రమంలో పప్పులు, కూరగాయలు, తృణధాన్యాల ప్రాముఖ్యతపై అవగాహన కల్పించారు. అనంతరం అక్షరాభ్యాసం, అన్నప్రాసన కార్యక్రమాలు ఘనంగా జరిగాయి. ఈ కార్యక్రమంలో డా. మహేష్, పంచాయతీ కార్యదర్శి కిశోర్, అంగన్‌వాడీ టీచర్ కే. శ్రీదేవి తదితరులు పాల్గొన్నారు.

భారతీయ సినీ పరిశ్రమలో తీవ్ర విషాదం చోటుచేసుకుంది. ప్రముఖ నటుడు నానా పటేకర్ (75) కన్నుమూశారు. గోవాలోని తన నివాసంలో గురువారం తెల్లవారుజామున తీవ్ర గుండెపోటుకు గురైన ఆయనను కుటుంబ సభ్యులు ఆసుపత్రికి తరలించారు. వైద్యులు సుమారు 45 నిమిషాల పాటు చికిత్స అందించినప్పటికీ ఫలితం లేకపోయింది. ఉదయం 5:20 గంటలకు ఆయన మృతి చెందినట్లు వైద్యులు ధ్రువీకరించారు. 1978లో ‘గమన్’ చిత్రంతో సినీ ప్రస్థానం ప్రారంభించిన నానా పటేకర్.. విలక్షణ నటన, శక్తివంతమైన డైలాగ్ డెలివరీతో ప్రత్యేక గుర్తింపు తెచ్చుకున్నారు. ‘పరిందా’, ‘అబ్ తక్ ఛప్పన్’, ‘యశ్వంత్’, ‘వెల్కమ్’, ‘రాజ్‌నీతి’, ‘నటసామ్రాట్’ వంటి చిత్రాల్లో తనదైన ముద్ర వేశారు. హిందీ, మరాఠీ చిత్రాల్లో విశిష్ట నటనతో మూడు జాతీయ అవార్డులు సహా పలు పురస్కారాలు అందుకున్నారు. ఆయన మృతితో బాలీవుడ్, మరాఠీ చిత్ర పరిశ్రమల్లో విషాదం నెలకొంది.

తెలంగాణలో విద్యుత్ డిమాండ్ చరిత్రలోనే అత్యధికంగా 19,892 మెగావాట్లకు చేరిందని ఉప ముఖ్యమంత్రి, విద్యుత్ శాఖ మంత్రి భట్టి విక్రమార్క తెలిపారు. దాదాపు 20 వేల మెగావాట్ల డిమాండ్ నమోదైనప్పటికీ రాష్ట్రంలో ఎక్కడా విద్యుత్ సరఫరాకు అంతరాయం లేకుండా చూశామని చెప్పారు. ప్రజాభవన్‌లో నిర్వహించిన విలేకరుల సమావేశంలో ఆయన మాట్లాడుతూ.. కర్ణాటకలో గరిష్ఠ డిమాండ్ 15 వేల మెగావాట్లలోపే, ఆంధ్రప్రదేశ్‌లో సుమారు 13 వేల మెగావాట్లుగా ఉందని తెలిపారు. పొరుగు రాష్ట్రాలతో పోలిస్తే తెలంగాణలో విద్యుత్ వినియోగం గణనీయంగా పెరిగిందన్నారు. రికార్డు డిమాండ్ సమయంలోనూ నిరంతర సరఫరా అందించిన విద్యుత్ సంస్థల అధికారులు, సిబ్బందిని అభినందించారు. విద్యుత్ సంస్థలను ప్రైవేటీకరించే లేదా ప్రభుత్వ రంగం నుంచి తప్పించే ఆలోచన లేదని స్పష్టం చేశారు. ప్రభుత్వ రంగ సంస్థలను మరింత బలోపేతం చేస్తూ విద్యుత్ రంగాన్ని పటిష్టం చేస్తామని భట్టి విక్రమార్క తెలిపారు.

ఢిల్లీలో కాంగ్రెస్ అగ్రనేతలు రాహుల్ గాంధీ, ప్రియాంక గాంధీ సహా ఇండియా కూటమి నేతలను పోలీసులు అదుపులోకి తీసుకోవడంపై తెలంగాణ సీఎం రేవంత్ రెడ్డి తీవ్ర ఆగ్రహం వ్యక్తం చేశారు. ప్రజాస్వామ్యబద్ధంగా నిరసన తెలిపే హక్కును అడ్డుకోవడం సరికాదన్నారు. బారాఖంబ పోలీస్ స్టేషన్‌లో ఉన్న రాహుల్ గాంధీని కలిసేందుకు వెళ్లిన తనను కూడా పోలీసులు అడ్డుకునేందుకు ప్రయత్నించారని తెలిపారు. కేంద్రంలోని బీజేపీ ప్రభుత్వం పోలీసు వ్యవస్థను ఉపయోగించి ప్రతిపక్షాల గొంతు నొక్కాలని చూస్తోందని ఆరోపించారు. ఓటు హక్కును హరించే చర్యలను ప్రజలు క్షమించరని అన్నారు. ఇది కాంగ్రెస్ పార్టీకి సంబంధించిన పోరాటం మాత్రమే కాదని, దేశ ప్రజల ప్రజాస్వామ్య హక్కుల పరిరక్షణ కోసం చేస్తున్న పోరాటమని స్పష్టం చేశారు. సీఈసీ జ్ఞానేశ్ కుమార్ నిష్పక్షపాతంగా వ్యవహరించడంలో విఫలమయ్యారని ఆరోపిస్తూ, ఆయన తక్షణమే రాజీనామా చేయాలని డిమాండ్ చేశారు. అరెస్టులు, పోలీసుల చర్యలతో ఉద్యమాన్ని అణచలేరని, పోరాటాన్ని మరింత ఉధృతం చేస్తామని పేర్కొన్నారు.

మూసీ పునరుజ్జీవ ప్రాజెక్టులో భాగంగా మంచిరేవుల వద్ద శ్రీ ఓంకారేశ్వర స్వామి ఆలయ అభివృద్ధికి తెలంగాణ ప్రభుత్వం రూ.1,108 కోట్లను మంజూరు చేసింది. ఆలయ నిర్మాణంతో పాటు అనుసంధాన రహదారి పనులకు ఈ నిధులను వినియోగించనున్నారు. ఆలయ కాంప్లెక్స్ నిర్మాణానికి సాంకేతిక సలహాలు, డిజైన్ల ఖరారు కోసం ఆర్‌అండ్‌బీ ఇంజినీర్ ఇన్ చీఫ్ నేతృత్వంలో ఆరుగురు సభ్యులతో ప్రత్యేక కమిటీని ప్రభుత్వం ఏర్పాటు చేసింది. ఆలయ ఆర్కిటెక్చర్ పనులకు రూ.599 కోట్లు, సివిల్, ప్లంబింగ్, ఎలక్ట్రికల్ తదితర పనులకు రూ.350 కోట్లు కేటాయించారు. ఇస్తానా విల్లాస్ నుంచి కీర్తి వెస్ట్ విండ్ విల్లాస్ వరకు గ్రేహౌండ్స్, యంగ్ ఇండియా పోలీస్ స్కూల్ మీదుగా ఆలయానికి చేరుకునేలా 2.5 కిలోమీటర్ల ఆరు లేన్ల, 100 అడుగుల రహదారి నిర్మాణానికి మరో రూ.160 కోట్లు మంజూరు చేశారు. ఆలయ అభివృద్ధి ద్వారా ఆధ్యాత్మిక, సాంస్కృతిక పర్యాటకాన్ని ప్రోత్సహించాలని ప్రభుత్వం లక్ష్యంగా పెట్టుకుంది.

ఓటర్ల జాబితా ప్రత్యేక సమగ్ర సవరణ (SIR) ప్రక్రియపై విపక్షాల ఆందోళన ఢిల్లీలో వరుసగా రెండో రోజూ కొనసాగింది. సీఈసీ జ్ఞానేశ్ కుమార్ రాజీనామా చేయాలని డిమాండ్ చేస్తూ ఇండియా కూటమి ఎంపీలు జంతర్‌మంతర్ వద్ద నిరసన చేపట్టారు. ఈసీ కార్యాలయానికి వెళ్లేందుకు ప్రయత్నించిన నేపథ్యంలో భారీగా పోలీసులను మోహరించారు. కాంగ్రెస్ అగ్రనేత రాహుల్ గాంధీ కేంద్ర ప్రభుత్వంపై తీవ్ర విమర్శలు చేశారు. తనపై నమోదైన ఎఫ్‌ఐఆర్‌లను ‘మెడల్స్‌’గా భావిస్తానని, ప్రజాస్వామ్యం కోసం పోరాటం కొనసాగిస్తానని అన్నారు. దాదాపు 300 మంది ఎంపీలు ఈసీని కలిసేందుకు వెళ్తే అనుమతి నిరాకరించారని ఆరోపించారు. ఇదే సమయంలో కాంగ్రెస్ ఎంపీ ప్రియాంక గాంధీ రోడ్డుపై బైఠాయించి నిరసన తెలిపారు. పోలీసుల తీరును ప్రశ్నించారు. అనంతరం రాహుల్, ప్రియాంక సహా పలువురు విపక్ష ఎంపీలను పోలీసులు అదుపులోకి తీసుకున్నారు.

తెలంగాణలో పెరుగుతున్న విద్యుత్‌ డిమాండ్‌ను తీర్చడంతోపాటు పునరుత్పాదక ఇంధన వినియోగ లక్ష్యాలను చేరుకునేందుకు విద్యుత్ పంపిణీ సంస్థలు (డిస్కంలు) భారీగా హరిత విద్యుత్ కొనుగోలుకు సిద్ధమయ్యాయి. వివిధ పునరుత్పాదక ఇంధన ప్రాజెక్టుల నుంచి మొత్తం **7,300 మెగావాట్ల విద్యుత్‌ను కొనుగోలు చేసేందుకు అనుమతి ఇవ్వాలని తెలంగాణ విద్యుత్ నియంత్రణ మండలి (ఈఆర్‌సీ)**ని కోరాయి. రాష్ట్ర విద్యుత్ చరిత్రలో ఇంత భారీ స్థాయిలో హరిత విద్యుత్ కొనుగోలుకు ప్రతిపాదించడం ఇదే తొలిసారిగా భావిస్తున్నారు. కేంద్ర విద్యుత్ ప్రాధికార సంస్థ (సీఈఏ) అంచనాల ప్రకారం తెలంగాణలో విద్యుత్ వినియోగం 2026-27లో 1,08,125 మిలియన్ యూనిట్ల నుంచి 2035-36 నాటికి 1,77,219 మిలియన్ యూనిట్లకు పెరగనుంది. ఇదే సమయంలో గరిష్ఠ విద్యుత్ డిమాండ్ 19,952 మెగావాట్ల నుంచి 29,812 మెగావాట్లకు చేరే అవకాశం ఉంది.

2026 సంవత్సరానికి రసాయన శాస్త్రంలో నోబెల్ బహుమతి ఫ్రాన్స్‌కు చెందిన హెన్రీ బి. కాగన్, జపాన్‌కు చెందిన కెన్సో సోయిని వరించింది. అసమమిత సేంద్రీయ సంశ్లేషణ, ఆటోక్యాటలిసిస్‌పై చేసిన కీలక పరిశోధనలకు గుర్తింపుగా ఈ పురస్కారం ప్రకటించారు. అనేక సేంద్రీయ అణువులు ఒకదానికొకటి అద్దం ప్రతిబింబాల్లా ఉండే రెండు రూపాల్లో కనిపిస్తాయి. అయితే జీవ వ్యవస్థలు సాధారణంగా వాటిలో ఒక రూపాన్నే ఉపయోగిస్తాయి. కావాల్సిన అణు రూపాన్ని నియంత్రితంగా తయారు చేయడం రసాయన శాస్త్రంలో సవాలుగా ఉంది. ఈ సమస్యకు కాగన్ అభివృద్ధి చేసిన అసమమిత ఉత్ప్రేరక విధానాలు, సోయి పరిశోధించిన ఆటోక్యాటలిటిక్ చర్యలు కీలక పరిష్కారాలను అందించాయి. ముఖ్యంగా ఔషధాల తయారీలో ఈ పరిశోధనలకు ప్రాధాన్యం ఉంది. ఒకే అణువుకు చెందిన రెండు రూపాలు శరీరంలో భిన్నంగా పనిచేసే అవకాశం ఉండటంతో, కావాల్సిన రూపాన్ని ఖచ్చితంగా తయారు చేయడం కీలకమైంది.

ముఖ్యమంత్రిగా, ప్రధానమంత్రిగా ప్రభుత్వ అధినేతగా 25 ఏళ్ల ప్రస్థానాన్ని పూర్తి చేసుకున్న సందర్భంగా ప్రధాని నరేంద్ర మోదీ దేశ ప్రజలకు కృతజ్ఞతలు తెలిపారు. తన రాజకీయ జీవితంలోని ప్రతి అనుభవం ఎన్నో విలువైన పాఠాలు నేర్పిందని, ప్రతి విజయం మరింత ఉన్నత లక్ష్యాల వైపు నడిపించిందని చెప్పారు. “దేశం నాకు ఎంతో ఇచ్చింది. అందుకే దేశం పట్ల నా బాధ్యత మరింత ఎక్కువ. నాపై దేశ ప్రజలకే అత్యధిక హక్కు ఉంది. 25 ఏళ్ల అనుభవమే నా గొప్ప ఆస్తి. అది నాది కాదు.. దేశానికి చెందుతుంది” అని అన్నారు. 2001 అక్టోబర్ 7న గుజరాత్ సీఎంగా ప్రమాణం చేసిన రోజును గుర్తుచేసుకున్న మోదీ, ప్రభుత్వ అధినేతగా 25 ఏళ్లు కొనసాగుతానని అప్పట్లో ఊహించలేదన్నారు. ప్రజల నిరంతర ఆశీర్వాదాలే ఈ ప్రస్థానానికి కారణమని పేర్కొన్నారు. కీర్తి, ప్రతిష్ఠల కంటే దేశ సేవకే ప్రాధాన్యం ఇస్తానని స్పష్టం చేశారు.

జ‌న‌గామ‌, అక్టోబర్ 07 (క్విక్ టుడే న్యూస్‌):

జనగామ జిల్లా తరిగొప్పుల మండలం అబ్దుల్ నగరం గ్రామంలో ప్రధాన రహదారి అయిన తరిగొప్పుల హనుమకొండ మార్గంలో రాముని సత్తయ్య కిరాణం దుకాణం వద్ద వీధి దీపం లేకపోవడంతో గ్రామం చీకటిలో మగ్గుతోంది. బతుకమ్మ పండుగ సందర్భంగా ఆడపిల్లలు బొడ్డెమ్మ పాటలు పాడుకుంటూ ఆడుకునే సమయంలో చీకటి కారణంగా తీవ్ర ఇబ్బందులు పడుతున్నారని మహిళలు ఆవేదన వ్యక్తం చేస్తున్నారు. రాత్రి వేళల్లో ప్రయాణికులు, చిన్నారులు భయంతో రోడ్డుపై నడవలేని పరిస్థితి నెలకొంది. ఎన్నిసార్లు అధికారులకు, సర్పంచ్ కు చెప్పినా పట్టించుకోవడం లేదని గ్రామస్తులు మండిపడుతున్నారు. ఇప్పటికైనా సంబంధిత అధికారులు స్పందించి వెంటనే వీధి దీపాన్ని ఏర్పాటు చేయాలని గ్రామ మహిళలు డిమాండ్ చేస్తున్నారు.

న్యూఢిల్లీ, అక్టోబర్ 6:

హర్మూజ్ జలసంధిలో ఉద్రిక్తతలు కొనసాగుతున్నాయి. పనామా జెండాతో ప్రయాణిస్తున్న ఎంటీ ఆన్ పీస్ వాణిజ్య నౌకపై మంగళవారం క్షిపణి దాడి జరిగింది. నౌకలోని 19 మంది సిబ్బందిలో 17 మంది భారతీయులు ఉండగా.. 12 మంది గాయపడ్డారు. వారిలో 11 మంది భారతీయ నావికులు ఉన్నట్లు భారత విదేశాంగ శాఖ వెల్లడించింది. ఒమన్ అధికారుల సహకారంతో క్షతగాత్రులను సురక్షితంగా తరలించి ఖసబ్‌లో చికిత్స అందిస్తున్నట్లు తెలిపింది. వాణిజ్య నౌకలు, నావికులపై దాడులను వెంటనే నిలిపివేయాలని భారత్ డిమాండ్ చేసింది. సముద్ర మార్గాల్లో భద్రత, స్వేచ్ఛాయుత నౌకాయానానికి ఆటంకాలు లేకుండా చర్యలు తీసుకోవాలని కోరింది. ఇదే సమయంలో మరో నౌకను ఇరాన్‌ రివల్యూషనరీ గార్డ్ హెచ్చరించి వెనక్కి మళ్లించినట్లు యూకేఎంటీఓ తెలిపింది. నల్లసముద్రంలో వాణిజ్య నౌకపై జరిగిన దాడినీ భారత్ ఖండించింది.

హైదరాబాద్, అక్టోబర్ 6:

లైంగిక వేధింపులు, బ్లాక్‌మెయిలింగ్‌ ఆరోపణల కేసులో అరెస్టైన ట్రైనీ ఐపీఎస్‌ ఉదయ్ కృష్ణారెడ్డికి ఉప్పరపల్లి కోర్టు మంగళవారం షరతులతో కూడిన బెయిల్ మంజూరు చేసింది. రూ.25 వేల చొప్పున రెండు పూచీకత్తులు సమర్పించాలని, ప్రతి ఆదివారం పోలీసుల ఎదుట విచారణకు హాజరుకావాలని న్యాయమూర్తి ఆదేశించారు. హైదరాబాద్‌లోని సర్దార్ వల్లభాయ్ పటేల్ నేషనల్ పోలీస్ అకాడమీలో మహిళా ట్రైనీ ఐపీఎస్‌ను వేధించడంతో పాటు బ్లాక్‌మెయిల్ చేశారన్న ఆరోపణలపై జూలై 18న అత్తాపూర్ పోలీస్ స్టేషన్‌లో కేసు నమోదైంది. అసభ్యకరమైన మెసేజ్‌లు పంపడంతో పాటు తన ఫోన్ లాక్కొని పాస్‌వర్డ్ చెప్పాలని బెదిరించారని బాధితురాలు ఫిర్యాదు చేసినట్లు పోలీసులు తెలిపారు. కేసు దర్యాప్తులో ఫోన్‌ చాటింగ్‌ వివరాలు, ఇతర ఆధారాలను పోలీసులు సేకరించారు. అనంతరం ఉదయ్‌ను అరెస్టు చేసి జ్యుడీషియల్ రిమాండ్‌కు తరలించారు. 67 రోజుల తర్వాత కోర్టు బెయిల్ మంజూరు చేసింది.

స్టాక్‌హోమ్, అక్టోబర్ 6:

భౌతికశాస్త్రంలో 2026 నోబెల్‌ బహుమతికి ప్రఖ్యాత శాస్త్రవేత్త ఫ్రాన్సిస్ హాల్జెన్ ఎంపికయ్యారు. ఖగోళ మూలాల నుంచి వచ్చే అత్యంత శక్తివంతమైన న్యూట్రినోలను గుర్తించడంతో పాటు, దక్షిణ ధ్రువం వద్ద ఐస్‌క్యూబ్‌ న్యూట్రినో అబ్జర్వేటరీ ఏర్పాటులో కీలక పాత్ర పోషించినందుకు ఆయనకు ఈ పురస్కారం లభించింది. నోబెల్‌ కమిటీ స్టాక్‌హోమ్‌లో విజేత పేరును ప్రకటించింది. ఈ ఏడాది పురస్కారం కింద 1.2 మిలియన్‌ అమెరికన్‌ డాలర్ల నగదు అందనుంది. బెల్జియంలో జన్మించిన 82 ఏళ్ల హాల్జెన్‌ ప్రస్తుతం అమెరికాలోని విస్కాన్సిన్‌-మాడిసన్‌ విశ్వవిద్యాలయంలో పనిచేస్తున్నారు. న్యూట్రినోలను ‘ఘోస్ట్‌ పార్టికల్స్‌’గా పిలుస్తారు. అత్యంత స్వల్ప ద్రవ్యరాశి, విద్యుదావేశం లేకపోవడంతో వీటిని గుర్తించడం కష్టం. దక్షిణ ధ్రువంలోని మంచులో కాంతి సెన్సార్లను ఏర్పాటు చేసి న్యూట్రినోలను గుర్తించే విధానాన్ని హాల్జెన్‌ అభివృద్ధి చేశారు. ఆయన పరిశోధనలు విశ్వంలోని అత్యంత శక్తివంతమైన ఖగోళ సంఘటనలను అధ్యయనం చేసేందుకు కొత్త మార్గాలను తెరిచాయి.

న్యూఢిల్లీ, అక్టోబర్06:

సీఈసీ జ్ఞానేశ్ కుమార్‌కు వ్యతిరేకంగా ప్రతిపక్షాలు చేపట్టిన నిరసనలో కాంగ్రెస్ అగ్రనేత రాహుల్ గాంధీ కేంద్రబిందువుగా నిలిచారు. పార్లమెంట్‌ నుంచి ఎన్నికల సంఘం కార్యాలయం వైపు ర్యాలీగా బయలుదేరిన రాహుల్‌తో పాటు పలువురు ప్రతిపక్ష ఎంపీలు పాల్గొన్నారు. పోలీసులు ర్యాలీని అడ్డుకోవడంతో ఎంపీలు ఆకాశవాణి భవన్‌ సమీపంలో బైఠాయించారు. ఈ సందర్భంగా రాహుల్ బారికేడ్లపైకి ఎక్కి జాతీయ జెండాను ఊపారు. అనంతరం పోలీసుల వలయాన్ని దాటుకుని ఆల్ ఇండియా రేడియో ప్రాంగణంలోకి వెళ్లి చెట్టు కింద బైఠాయించారు. సీఈసీని కలిసి ‘ఓట్ల చోరీ’పై ప్రశ్నించేందుకే తన నిరసన అని రాహుల్ తెలిపారు. ఆయనతో పాటు ప్రియాంక గాంధీ కూడా ధర్నాలో పాల్గొన్నారు. అఖిలేశ్ యాదవ్, అభిషేక్ బెనర్జీ తదితరులను పోలీసులు అదుపులోకి తీసుకుని అనంతరం విడుదల చేశారు. మరోవైపు రాహుల్‌ నిరసనపై బీజేపీ తీవ్ర విమర్శలు చేసింది.