ఫారమ్-6 మార్పులపై సుప్రీంకోర్టు కీలక వ్యాఖ్యలు.. కేంద్రం, ఈసీకి నోటీసులు..
న్యూఢిల్లీ, అక్టోబర్5:
ఓటర్లుగా నమోదు కోసం ఉపయోగించే ఫారమ్-6లో మార్పులపై సుప్రీంకోర్టు కీలక వ్యాఖ్యలు చేసింది. సవరించిన ఫారమ్-6ను తాము ఆమోదించలేదని ప్రధాన న్యాయమూర్తి జస్టిస్‌ సూర్యకాంత్‌ స్పష్టం చేశారు. అసలు మార్పు జరిగిందా? జరిగితే ఎవరు చేశారన్నది రికార్డులు పరిశీలించిన తర్వాతే తేలుస్తామని ధర్మాసనం పేర్కొంది. ఫారమ్-6ను తాము సవరించలేదని ఎన్నికల సంఘం చెబుతోంది. ప్రత్యేక ఓటర్ల జాబితా సవరణ (SIR) కోసం అదనపు డిక్లరేషన్‌ను మాత్రమే చేర్చామని వివరిస్తోంది. ఈ అంశంతో పాటు సీఈసీ జ్ఞానేశ్‌ కుమార్‌ నిర్ణయాలపై దాఖలైన పిటిషన్లను విచారించిన సుప్రీంకోర్టు.. కేంద్రం, ఈసీకి నోటీసులు జారీ చేసి వారం రోజుల్లో సమాధానం ఇవ్వాలని ఆదేశించింది. సీఈసీ నిర్ణయాలు ఇతర ఇద్దరు ఎన్నికల కమిషనర్ల అనుమతి లేకుండా తీసుకున్నారన్న పిటిషనర్ల వాదనలను కూడా ధర్మాసనం పరిశీలించనుంది. అయితే సీఈసీ విధులకు ఆటంకం కలిగించే మధ్యంతర ఉత్తర్వులు జారీ చేయలేదు.
