ఏపీలో అతిభారీ వర్షాలు: అధికారులను అప్రమత్తం చేసిన హోంమంత్రి అనిత

ఆంధ్రప్రదేశ్‌లో అతిభారీ వర్షాలు కురుస్తున్న నేపథ్యంలో ప్రజలకు ఎలాంటి ఇబ్బందులు తలెత్తకుండా అప్రమత్తంగా ఉండాలని రాష్ట్ర హోంమంత్రి అనిత అధికారులను ఆదేశించారు. పరిస్థితిని బట్టి అవసరమైతే తీర, లోతట్టు ప్రాంతాల ప్రజలను వెంటనే పునరావాస కేంద్రాలకు తరలించాలని స్పష్టం చేశారు. ప్రమాదకరంగా మారిన వాగులు, కాజ్‌వేల వద్ద ఎటువంటి ప్రాణనష్టం జరగకుండా ముందస్తు చర్యల్లో భాగంగా రాకపోకలను పూర్తిగా నిలిపివేయాలని సూచించారు. ప్రజల కోసం నిత్యావసర వస్తువులు, అత్యవసర సదుపాయాలను ముందుగానే సిద్ధం చేసి ఉంచాలని అధికారులకు దిశానిర్దేశం చేశారు. అలాగే, శిథిలావస్థలో ఉన్న ఇళ్లలో ప్రజలు ఎవరూ ఉండొద్దని విజ్ఞప్తి చేశారు. వాతావరణ పరిస్థితులపై ప్రభుత్వం ఎప్పటికప్పుడు జారీ చేసే అధికారిక సూచనలను ప్రజలంతా తప్పనిసరిగా పాటించాలని హోంమంత్రి అనిత కోరారు.