నవంబర్ 29న ఎస్సై ప్రిలిమ్స్.. డిసెంబర్ 20న కానిస్టేబుల్ పరీక్ష
తెలంగాణలో పోలీస్ ఉద్యోగాల కోసం ఎదురుచూస్తున్న అభ్యర్థులకు కీలక సమాచారం వెలువడింది. ఎస్సై, కానిస్టేబుల్ పోస్టుల భర్తీకి నిర్వహించనున్న ప్రాథమిక రాత పరీక్షల తేదీలను తెలంగాణ రాష్ట్ర స్థాయి పోలీస్ నియామక మండలి (టీఎస్ఎల్పీఆర్బీ) ప్రకటించింది. ఎస్సై పోస్టులకు నవంబర్ 29న, కానిస్టేబుల్ పోస్టులకు డిసెంబర్ 20న ప్రిలిమినరీ పరీక్షలు నిర్వహించనున్నట్లు బోర్డు ఛైర్మన్ వి.వి. శ్రీనివాసరావు వెల్లడించారు. పోలీస్, స్పెషల్ ప్రొటెక్షన్ ఫోర్స్, అగ్నిమాపక, జైళ్ల శాఖల్లో కలిపి 7,437 పోస్టుల భర్తీకి నోటిఫికేషన్ విడుదలైన విషయం తెలిసిందే. ఆగస్టు 19 నుంచి సెప్టెంబర్ 16 వరకు 28 రోజుల వ్యవధిలో మొత్తం 5,77,064 దరఖాస్తులు అందినట్లు టీఎస్ఎల్పీఆర్బీ తెలిపింది. వీటిలో ఎస్సై పోస్టులకు 1,60,756, కానిస్టేబుల్ పోస్టులకు 3,89,356 మంది దరఖాస్తు చేసుకున్నారు.
దరఖాస్తుదారుల్లో 74.66 శాతం మంది పురుషులు, 25.33 శాతం మంది మహిళలు ఉన్నారు. సామాజిక వర్గాల వారీగా బీసీలు 49.19 శాతం, ఎస్సీ/ఎస్టీలు 43.60 శాతం, ఓసీలు 7.20 శాతం ఉన్నట్లు బోర్డు గణాంకాలు వెల్లడించాయి. పరీక్షల నిర్వహణకు అధికారులు ఏర్పాట్లు చేస్తున్నారు. ఎస్సై ప్రిలిమినరీ పరీక్షను పాత 10 జిల్లాల కేంద్రాల్లో నిర్వహించేందుకు, కానిస్టేబుల్ పరీక్షను 15 నుంచి 18 ప్రాంతాల్లో చేపట్టేందుకు ప్రణాళిక రూపొందిస్తున్నారు. ఇదిలా ఉండగా, దరఖాస్తు ప్రక్రియలో భాగమైన ఆధార్ ఫేస్ అథెంటికేషన్ను ఇప్పటికే 97.4 శాతం మంది అభ్యర్థులు పూర్తి చేశారు. సాంకేతిక కారణాలతో ప్రక్రియను పూర్తి చేయలేకపోయిన వారికి సెప్టెంబర్ 30 వరకు అదనపు అవకాశం కల్పించినట్లు బోర్డు తెలిపింది. అభ్యర్థులు పరీక్షకు సమయం సద్వినియోగం చేసుకుని సిలబస్తో పాటు గత ప్రశ్నపత్రాలను క్షుణ్ణంగా అధ్యయనం చేయాలని అధికారులు సూచించారు. పరీక్షలకు సంబంధించిన తాజా సమాచారం కోసం టీఎస్ఎల్పీఆర్బీ అధికారిక వెబ్సైట్ను పరిశీలించాలని కోరారు.
