ప్రపంచ చెల్లింపు వ్యవస్థలతో UPI అనుసంధానమే తదుపరి లక్ష్యం

ముంబై, సెప్టెంబర్‌ 8:

భారతదేశం అభివృద్ధి చేసిన యూనిఫైడ్ పేమెంట్స్ ఇంటర్‌ఫేస్‌ (UPI) ప్రస్తుతం 11 దేశాల్లో అందుబాటులో ఉందని ప్రధాని నరేంద్ర మోదీ తెలిపారు. ప్రపంచంలోని ఇతర దేశాల చెల్లింపు వ్యవస్థలతో UPIని అనుసంధానం చేయడం తదుపరి లక్ష్యంగా ఉండాలని ఫిన్‌టెక్‌ రంగానికి ఆయన సూచించారు. మంగళవారం ముంబైలో జరిగిన గ్లోబల్ ఫిన్‌టెక్ ఫెస్ట్‌–2026లో ప్రధాని ప్రసంగించారు. అంతర్జాతీయ కార్డు చెల్లింపులు ఇప్పటికీ ఇతర దేశాల్లో అభివృద్ధి చేసిన వ్యవస్థలపై ఆధారపడి ఉన్నాయని మోదీ పేర్కొన్నారు. అయితే, భారత్‌ తన అవసరాలకు అనుగుణంగా సొంతంగా రూపొందించుకున్న UPI వంటి చెల్లింపు వ్యవస్థను కలిగి ఉందన్నారు. UPI ద్వారా భారత్‌ తన సొంత నియమాలు, ప్రమాణాలను రూపొందించుకుని వాటిని ప్రపంచంలోని ఇతర చెల్లింపు వ్యవస్థలతో అనుసంధానం చేసుకునే అవకాశం ఉందని చెప్పారు. UPI కేవలం డిజిటల్‌ చెల్లింపుల వేదికగా మాత్రమే కాకుండా, అంతర్జాతీయ ఆర్థిక లావాదేవీల్లో భారత్‌ సామర్థ్యాన్ని మరింత పెంచే సాధనంగా మారగలదని ప్రధాని ఆశాభావం వ్యక్తం చేశారు.

UPI ద్వారా లావాదేవీల సమయం, వ్యయం రెండూ గణనీయంగా తగ్గే అవకాశం ఉందన్నారు. సాంకేతికత అందరికీ ఆర్థిక సేవలను చేరువ చేసే శక్తివంతమైన సాధనం అని మోదీ పేర్కొన్నారు. సాంప్రదాయ బ్యాంకులు, బ్యాంకు శాఖలు చేరుకోలేని ప్రాంతాలు, ప్రజలకు ఫిన్‌టెక్‌ సేవలు అందుబాటులోకి తీసుకురావడమే వాటి ప్రత్యేకత కావాలని సూచించారు. మారుమూల ప్రాంతాల్లో నివసించే ప్రజలకు ఆధునిక డిజిటల్‌ ఆర్థిక సేవలను అందించడంలో UPI గణనీయమైన విజయాన్ని సాధించిందన్నారు. విదేశాల్లో పెద్ద సంఖ్యలో భారతీయులు నివసిస్తున్నారని, వారు స్వదేశానికి భారీగా నిధులు పంపుతున్నారని మోదీ తెలిపారు. ప్రస్తుతం అంతర్జాతీయ మనీ ట్రాన్స్‌ఫర్లకు అయ్యే లావాదేవీ ఖర్చులను UPI అనుసంధానం ద్వారా గణనీయంగా తగ్గించవచ్చని చెప్పారు. అదే సమయంలో నిధులు వేగంగా స్వదేశానికి చేరేలా చేయవచ్చని పేర్కొన్నారు.