ఓటుకు నోటు కేసులో కీలక మలుపు.. సుప్రీంకోర్టులో స్టీఫెన్సన్ ఇంప్లీడ్ పిటిషన్
హైదరాబాద్‌, అక్టోబర్‌ 5 (క్విక్ టుడే న్యూస్‌):
2015 నాటి ఓటుకు నోటు కేసులో కీలక పరిణామం చోటుచేసుకుంది. నామినేటెడ్‌ మాజీ ఎమ్మెల్యే ఎల్విస్‌ స్టీఫెన్సన్ సుప్రీంకోర్టును ఆశ్రయించారు. కేసు విచారణలో తన వాదనలు కూడా వినాలని కోరుతూ ఇంప్లీడ్ పిటిషన్ దాఖలు చేశారు. ప్రధాన ఫిర్యాదుదారుగా తన వాదనలు పరిగణనలోకి తీసుకోవడం నిష్పక్షపాత విచారణకు అవసరమని ఆయన తరఫు న్యాయవాది కోర్టుకు తెలిపారు. తెలంగాణలో 2015 ఎమ్మెల్సీ ఎన్నికల సమయంలో టీడీపీ అభ్యర్థికి అనుకూలంగా ఓటు వేయించేందుకు డబ్బు ఇవ్వజూపారన్న ఆరోపణలతో అప్పటి టీడీపీ ఎమ్మెల్యే రేవంత్‌రెడ్డిపై ఏసీబీ కేసు నమోదు చేసింది. ఈ కేసులో ఆడియో, వీడియో రికార్డులు కీలక ఆధారాలుగా ఉన్నాయి. తనపై నమోదైన ఎఫ్‌ఐఆర్‌ను కొట్టివేయాలని కోరుతూ రేవంత్‌రెడ్డి దాఖలు చేసిన పిటిషన్‌పై సుప్రీంకోర్టు విచారణ కొనసాగుతోంది. తాజాగా స్టీఫెన్సన్ ఇంప్లీడ్ పిటిషన్ దాఖలు చేయడంతో కేసు మరోసారి ప్రాధాన్యం సంతరించుకుంది.
