ఖైరతాబాద్, బాలాపూర్ గణేశ్ల దర్శనానికి ఆర్టీసీ ప్రత్యేక బస్సులు
హైదరాబాద్, సెప్టెంబర్ 13:
వినాయక నవరాత్రి ఉత్సవాల సందర్భంగా నగరంలోని ప్రముఖ గణేశ్ మండపాలకు భక్తుల రద్దీ పెరగనున్న నేపథ్యంలో తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) కీలక నిర్ణయం తీసుకుంది. భక్తుల ప్రయాణ సౌకర్యాన్ని దృష్టిలో ఉంచుకుని ఈ నెల 14 నుంచి 24వ తేదీ వరకు ప్రత్యేక సిటీ బస్సులను నడపనున్నట్లు ప్రకటించింది. ఖైరతాబాద్ మహాగణపతి, బాలాపూర్ గణేశ్ మండపాలను దర్శించుకునేందుకు పెద్ద సంఖ్యలో భక్తులు తరలివచ్చే అవకాశం ఉండటంతో జేబీఎస్, ఎంజీబీఎస్ బస్ స్టేషన్ల నుంచి ప్రత్యేక సర్వీసులను అందుబాటులో ఉంచుతున్నట్లు టీజీఎస్ఆర్టీసీ ఎండీ నాగిరెడ్డి తెలిపారు. భక్తులు ప్రజా రవాణా సదుపాయాన్ని వినియోగించుకుని సురక్షితంగా గమ్యస్థానాలకు చేరుకోవాలని ఆయన సూచించారు.
ఈ మార్గాల్లో ప్రత్యేక బస్సులు
జేబీఎస్ నుంచి ప్రారంభమయ్యే ప్రత్యేక బస్సులు ప్యాట్నీ, బాటా, బోట్ క్లబ్, ట్యాంక్బండ్, ఐమ్యాక్స్, ఖైరతాబాద్, లక్డీకాపూల్, గాంధీభవన్, అఫ్జల్గంజ్ మీదుగా సీబీఎస్/ఎంజీబీఎస్కు చేరుకుంటాయి. అక్కడి నుంచి విమెన్స్ కాలేజ్, జె.గార్డెన్, గవర్నమెంట్ ప్రెస్, ఐఎస్ సదన్, పిసల్బండ, మిధాని టౌన్షిప్, బాలాపూర్ ఎక్స్ రోడ్స్, శివాజీచౌక్ మీదుగా బాలాపూర్కు బస్సులు చేరుతాయి. గణేశ్ ఉత్సవాల సమయంలో ట్రాఫిక్ రద్దీని దృష్టిలో ఉంచుకుని భక్తులకు ఇబ్బందులు తలెత్తకుండా ప్రత్యేక సర్వీసులను ఏర్పాటు చేసినట్లు ఆర్టీసీ అధికారులు తెలిపారు. ఖైరతాబాద్, బాలాపూర్ గణేశ్ ఉత్సవాలకు వెళ్లే భక్తులు ఈ ప్రత్యేక బస్సు సర్వీసులను సద్వినియోగం చేసుకోవాలని టీజీఎస్ఆర్టీసీ ఎండీ నాగిరెడ్డి కోరారు.
