తెలంగాణలో తీవ్రంగా పడిపోతున్న భూగర్భ జలాలు

ఎల్ నినో ప్రభావంతో తెలంగాణ రాష్ట్రంలో భూగర్భ జలాలు క్రమంగా అడుగంటుతున్నాయి. గత ఏడాది (2025) ఆగస్టు నెలతో పోల్చి చూస్తే ప్రస్తుత నీటి మట్టాలు సగటున 2.09 మీటర్ల మేర లోతుకు పడిపోవడం తీవ్ర ఆందోళన కలిగిస్తోంది. సాధారణంగా జూన్ 1వ తేదీ నుంచి ఆగస్టు 31 వరకు రాష్ట్ర వ్యాప్తంగా 574 మిల్లీమీటర్ల వర్షపాతం నమోదు కావాల్సి ఉండగా, ఈసారి కేవలం 474 మిల్లీమీటర్ల వర్షం మాత్రమే కురిసింది.

ఈ వర్షాభావ పరిస్థితుల కారణంగా రాష్ట్రంలోని దాదాపు 17 జిల్లాల్లో లోటు వర్షపాతం నమోదైంది. ముఖ్యంగా మేడ్చల్ జిల్లాలో పరిస్థితి మరింత దారుణంగా ఉంది. అక్కడ భూగర్భ జలాలు అత్యధికంగా 12.12 మీటర్ల అట్టడుగుకు పడిపోయాయి. వర్షాలు ఆశించిన స్థాయిలో కురవకపోవడంతో రానున్న రోజుల్లో నీటి ఎద్దడి మరింత పెరిగే ప్రమాదం ఉందని వాతావరణ శాఖ గణాంకాలు స్పష్టం చేస్తున్నాయి.