బాలాపూర్ లడ్డూకు రికార్డు ధర.. రూ.39 లక్షలకు సొంతం చేసుకున్న సామ ప్రణీత్ రెడ్డి
హైదరాబాద్, సెప్టెంబర్25(క్విక్ టుడే న్యూస్):
హైదరాబాద్లో అత్యంత ఆసక్తిగా ఎదురుచూసే బాలాపూర్ గణేశుడి లడ్డూ వేలం పాట ఈసారి సరికొత్త రికార్డు నెలకొల్పింది. భక్తుల విశ్వాసానికి ప్రతీకగా భావించే ఈ లడ్డూ కోసం జరిగిన వేలంలో ఏకంగా రూ.39 లక్షల ధర పలికింది. వనస్థలిపురం సాహెబ్నగర్కు చెందిన సామ ప్రణీత్ రెడ్డి అత్యధికంగా బిడ్ వేసి లడ్డూను సొంతం చేసుకున్నారు. వేలంలో పాల్గొనేందుకు మొత్తం ఎనిమిది మంది పేర్లు నమోదు చేసుకోగా.. చివరకు ప్రణీత్ రెడ్డి విజేతగా నిలిచారు. బాలాపూర్ లడ్డూ వేలం పాటకు మూడు దశాబ్దాలకు పైగా ప్రత్యేక గుర్తింపు ఉంది. 1994లో కేవలం రూ.450తో ప్రారంభమైన ఈ వేలం.. ఏటేటా ధర పెరుగుతూ కోట్లాది మంది దృష్టిని ఆకర్షిస్తోంది. 2002లో తొలిసారి రూ.లక్ష దాటిన లడ్డూ ధర.. 2015లో రూ.10.32 లక్షలకు చేరింది. 2017లో రూ.15.60 లక్షలు, 2018లో రూ.16.60 లక్షలు పలికింది. కరోనా కారణంగా 2020లో వేలం నిర్వహించలేదు. గతేడాది రూ.35 లక్షలు పలికిన లడ్డూ.. ఈసారి మరో రూ.4 లక్షలు పెరిగి రూ.39 లక్షలకు చేరింది. లడ్డూను దక్కించుకుంటే కుటుంబానికి శుభం, సిరిసంపదలు కలుగుతాయన్న భక్తుల నమ్మకమే ఈ వేలానికి ప్రత్యేక ఆకర్షణగా నిలుస్తోంది.
