ఉత్తర తెలంగాణలో విస్తార వర్షాలు.. ఉప్పొంగుతున్న వాగులు, నదులు
హైదరాబాద్, జూలై 30:
వాయువ్య బంగాళాఖాతంలో ఏర్పడిన తీవ్ర వాయుగుండం ప్రభావంతో ఉత్తర తెలంగాణ జిల్లాల్లో భారీ నుంచి అతి భారీ వర్షాలు కురుస్తున్నాయి. మరో మూడు రోజుల పాటు రాష్ట్రవ్యాప్తంగా వర్షాలు కొనసాగనున్నాయని హైదరాబాద్ వాతావరణ కేంద్రం హెచ్చరించింది. ఎడతెరిపి లేకుండా కురుస్తున్న వర్షాలతో గోదావరి, ప్రాణహిత సహా ప్రధాన నదులు ఉద్ధృతంగా ప్రవహిస్తుండగా, వాగులు, వంకలు పొంగిపొర్లుతున్నాయి. ఫలితంగా రాష్ట్రంలోని ప్రధాన జలాశయాలకు భారీగా వరదనీరు చేరుతోంది.శ్రీరాంసాగర్ ప్రాజెక్టుకు వరద ప్రవాహం పెరుగుతుండగా, ప్రస్తుతం 12,900 క్యూసెక్కుల ఇన్ఫ్లో నమోదైంది. ప్రాజెక్టులో 17.103 టీఎంసీల నీటి నిల్వ ఉండగా, కాకతీయ కాలువకు 300 క్యూసెక్కుల నీటిని విడుదల చేస్తున్నారు. నిర్మల్ జిల్లా స్వర్ణ ప్రాజెక్టుకు దాదాపు 10 వేల క్యూసెక్కుల వరదనీరు చేరుతుండగా, కడెం ప్రాజెక్టుకు 77,442 క్యూసెక్కుల ఇన్ఫ్లో నమోదవడంతో అధికారులు ఆరు గేట్లు ఎత్తి దిగువకు నీటిని విడుదల చేస్తున్నారు.జయశంకర్ భూపాలపల్లి జిల్లా కాళేశ్వరం వద్ద గోదావరి, ప్రాణహిత నదులు ఉద్ధృతంగా ప్రవహిస్తున్నాయి. మేడిగడ్డ లక్ష్మీ బ్యారేజ్కు భారీ వరద ప్రవాహం చేరడంతో ఎన్డీఎస్ఏ మార్గదర్శకాల మేరకు 85 గేట్లను ఎత్తి ఉంచారు. ప్రస్తుతం ఇన్ఫ్లో, అవుట్ఫ్లో రెండూ 1,01,530 క్యూసెక్కులుగా కొనసాగుతున్నాయి.
భారీ వర్షాల దృష్ట్యా ఆదిలాబాద్, నిజామాబాద్, మెదక్, సంగారెడ్డి, వికారాబాద్ తదితర తొమ్మిది జిల్లాలకు వాతావరణ శాఖ ఆరెంజ్ అలర్ట్, కరీంనగర్, భూపాలపల్లి, ములుగు సహా ఆరు జిల్లాలకు ఎల్లో అలర్ట్ జారీ చేసింది. నిజామాబాద్, ఆదిలాబాద్ జిల్లాల్లో చెరువులు నిండిపోగా, అనేక వాగులు పొంగిపొర్లడంతో కొన్ని గ్రామాలకు రాకపోకలు నిలిచిపోయాయి. జగిత్యాల జిల్లాలో పాఠశాలలకు సెలవు ప్రకటించారు. భద్రాచలం వద్ద గోదావరి నీటిమట్టం 27 అడుగులకు చేరగా, ఎగువ ప్రాంతాల నుంచి వరద ప్రవాహం కొనసాగుతుండటంతో మరింత పెరిగే అవకాశం ఉందని అధికారులు తెలిపారు. లోతట్టు ప్రాంతాల ప్రజలు అప్రమత్తంగా ఉండాలని, అవసరమైతే తప్ప బయటకు రావద్దని సూచించారు. ములుగు జిల్లా వాజేడు మండలంలోని బొగత జలపాతం భారీ ప్రవాహంతో ఉప్పొంగడంతో పర్యాటకుల ప్రవేశాన్ని అటవీశాఖ తాత్కాలికంగా నిలిపివేసింది. రాష్ట్రంలో అత్యధికంగా వాజేడులో 16.5 సెంటీమీటర్ల వర్షపాతం నమోదుకాగా, ఏటూరునాగారం, సర్వాయిపేట, జైపూర్, బెజ్జూరు, కన్నాయిగూడెం తదితర ప్రాంతాల్లోనూ భారీ వర్షాలు నమోదయ్యాయి.
