దివ్యాంగులకు గుడ్ న్యూస్.. ఏపీలో వాట్సాప్ ద్వారా సదరం సర్టిఫికెట్ల డౌన్లోడ్
ఇంటర్నెట్ డెస్క్:
ఆంధ్రప్రదేశ్లో దివ్యాంగుల కోసం ప్రభుత్వం మరో వినూత్న సేవను అందుబాటులోకి తీసుకొచ్చింది. సదరం సేవలను మరింత సులభతరం చేస్తూ మనమిత్ర వాట్సాప్ గవర్నెన్స్ ద్వారా సదరం సర్టిఫికెట్ల డౌన్లోడ్ సౌకర్యాన్ని ప్రారంభించింది. ఈ విషయాన్ని రియల్ టైమ్ గవర్నెన్స్ సొసైటీ (ఆర్టీజీఎస్) వెల్లడించింది. ఇకపై దివ్యాంగులు ప్రభుత్వ కార్యాలయాలకు వెళ్లాల్సిన అవసరం లేకుండా వాట్సాప్ ద్వారానే పలు సేవలను పొందవచ్చు. ఇందుకోసం మనమిత్ర వాట్సాప్ నంబర్ 9552300009కు "హాయ్" అని సందేశం పంపి, అందులో కనిపించే సదరం సేవల ఎంపికను ఎంచుకోవాలి. ఈ వేదిక ద్వారా సదరం స్లాట్ బుకింగ్, స్లాట్ లభ్యత వివరాల పరిశీలనతో పాటు సదరం సర్టిఫికెట్లను నేరుగా డౌన్లోడ్ చేసుకునే అవకాశం కల్పించారు. దివ్యాంగులకు ప్రభుత్వ సేవలను మరింత వేగంగా, పారదర్శకంగా అందించాలనే లక్ష్యంతో ఈ సౌకర్యాన్ని ప్రవేశపెట్టినట్లు ఆర్టీజీఎస్ తెలిపింది. ఈ డిజిటల్ సేవలను దివ్యాంగులు విస్తృతంగా వినియోగించుకోవాలని ప్రభుత్వం విజ్ఞప్తి చేసింది.
