బ్రిటన్‌లో విమాన సేవలకు భారీ అంతరాయం

న్యూఢిల్లీ, సెప్టెంబర్ 9:

బ్రిటన్‌లో ఎయిర్ ట్రాఫిక్ కంట్రోల్ వ్యవస్థలో తలెత్తిన సాంకేతిక సమస్య కారణంగా మంగళవారం విమాన రాకపోకలు తీవ్రంగా దెబ్బతిన్నాయి. దేశవ్యాప్తంగా 1,000కుపైగా విమానాలు రద్దు కాగా, వందలాది విమానాలు గంటల తరబడి ఆలస్యమయ్యాయి. ఈ అంతరాయం ప్రభావం భారత విమానయాన సంస్థలపైనా పడింది. విమానాల కదలికలను పర్యవేక్షించే ఫ్లైట్‌రాడార్24 ప్రకారం, సాంకేతిక సమస్య బ్రిటన్‌లోని 15 విమానాశ్రయాలపై ప్రభావం చూపింది. దీంతో టెర్మినల్స్, రన్‌వేల వద్ద ప్రయాణికులు గంటల తరబడి వేచి ఉండాల్సి వచ్చింది. బ్రిటన్ నేషనల్ ఎయిర్ ట్రాఫిక్ సర్వీసెస్ (NATS) తన ఫ్లైట్ ప్రాసెసింగ్ వ్యవస్థలో ఏర్పడిన సమస్యను సాయంత్రానికి పరిష్కరించినట్లు ప్రకటించింది. అయితే అప్పటికే పెద్ద సంఖ్యలో విమానాలు ఆలస్యం కావడంతో ఆ ప్రభావం మరికొన్ని గంటల పాటు కొనసాగింది. లండన్ హీత్రో విమానాశ్రయంలో విమానాల బయలుదేరే సేవలు పునరుద్ధరించినప్పటికీ, రాత్రి సమయంలో రాక విమానాలను నిలిపివేశారు.

ప్రయాణికులు తమ విమానాల పరిస్థితిని సంబంధిత ఎయిర్‌లైన్స్ ద్వారా తెలుసుకోవాలని అధికారులు సూచించారు. ఈ అంతరాయం బ్రిటిష్ ఎయిర్‌వేస్, ర్యానైర్, ఈజీజెట్ వంటి సంస్థల సేవలపై తీవ్ర ప్రభావం చూపింది. బ్రిటిష్ ఎయిర్‌వేస్ 100కుపైగా విమానాలను రద్దు లేదా దారి మళ్లించగా, ర్యానైర్‌కు చెందిన 65 వేల మందికిపైగా ప్రయాణికులు ప్రభావితమయ్యారు. 50కుపైగా విమానాలను రద్దు చేసినట్లు సంస్థ తెలిపింది. భారత్ నుంచి బ్రిటన్‌కు రాకపోకలు సాగించే విమానాలపైనా అంతరాయం ఏర్పడింది. ముంబయి నుంచి లండన్ వెళ్తున్న ఎయిర్ ఇండియా విమానాన్ని స్విట్జర్లాండ్‌లోని జ్యూరిచ్‌కు దారి మళ్లించారు. విమానంలో 290 మంది ప్రయాణికులు ఉన్నట్లు సంస్థ వెల్లడించింది. యూకేకు వెళ్లే, అక్కడి నుంచి వచ్చే కొన్ని విమానాలు రద్దు కాగా, మరికొన్ని ఆలస్యమైనట్లు ఎయిర్ ఇండియా తెలిపింది. ఈ అంతరాయం బుధవారం కూడా కొనసాగే అవకాశం ఉందని, ప్రయాణికులు విమానం బయలుదేరే ముందు షెడ్యూల్‌ను మరోసారి పరిశీలించాలని సూచించింది.