తెలంగాణ పోలీస్ ఉద్యోగాల్లో ట్రాన్స్‌జెండర్లకు అవకాశం.. హైకోర్టు కీలక ఆదేశాలు

తెలంగాణలో పోలీస్ కానిస్టేబుల్, ఎస్ఐ పోస్టుల భర్తీకి సంబంధించి హైకోర్టు కీలక ఆదేశాలు జారీ చేసింది. ఈ ఉద్యోగాలకు ట్రాన్స్‌జెండర్ల దరఖాస్తులను కూడా తప్పనిసరిగా స్వీకరించాలని టీఎస్‌ఎల్‌పీఆర్‌బీ (TSLPRB)ని న్యాయస్థానం ఆదేశించింది. దరఖాస్తుల్లో కేవలం మేల్, ఫీమేల్ ఆప్షన్లు మాత్రమే ఇచ్చి, మిగతా జెండర్లకు ఎందుకు అవకాశం కల్పించలేదని బోర్డును కోర్టు ప్రశ్నించింది.

ఈ విధానాన్ని వ్యతిరేకిస్తూ తనుశ్రీ మరియు మరో ముగ్గురు దాఖలు చేసిన పిటిషన్‌ను విచారించిన కోర్టు.. ఆన్‌లైన్‌లో దరఖాస్తులకు సాంకేతిక ఇబ్బందులు ఉంటే, ఆఫ్‌లైన్‌లోనైనా వారి అప్లికేషన్లు తీసుకోవాలని స్పష్టం చేసింది. పూర్తి వివరాలతో కౌంటర్ దాఖలు చేయాలని ఆదేశిస్తూ తదుపరి విచారణను ఈ నెల 16కు వాయిదా వేసింది.