లారీ ఢీకొని దెబ్బతిన్న విగ్రహం.. వర్షానికి నేలమట్టం

తొర్రూరు సెప్టెంబర్ 24(క్విక్ టుడే న్యూస్)
నాలుగు రోజుల క్రితం లారీ ఢీకొనడంతో పాక్షికంగా దెబ్బతిన్న బాబు జగ్జీవన్‌రామ్‌ విగ్రహం అధికారుల నిర్లక్ష్యంతో పూర్తిగా ధ్వంసమైంది.

తొర్రూరు పాలకేంద్రం చౌరస్తాలో చోటుచేసుకున్న ఈ ఘటనపై స్థానికులు ఆగ్రహం వ్యక్తం చేస్తున్నారు.నాలుగు రోజుల క్రితం లారీ ఢీకొనడంతో విగ్రహం బేస్‌ పాక్షికంగా దెబ్బతిని పక్కకు ఒరిగింది.

అప్పటి నుంచి అధికారులు,ప్రజాప్రతినిధులు పట్టించుకోకపోవడంతో మరమ్మతులు చేపట్టలేదు.

ఈ క్రమంలో బుధవారం మధ్యాహ్నం నుంచి కురుస్తున్న వర్షానికి విగ్రహం నేలకొరిగి పూర్తిగా ధ్వంసమైంది.విగ్రహం దెబ్బతిన్న విషయం తెలిసినా అధికారులు,ప్రజాప్రతినిధులు స్పందించకపోవడం వల్లే ఈ పరిస్థితి తలెత్తిందని స్థానికులు మండిపడుతున్నారు.

ఇప్పటికైనా అధికారులు స్పందించి విగ్రహాన్ని పునరుద్ధరించాలని,ఘటనకు బాధ్యులపై చర్యలు తీసుకోవాలని కోరుతున్నారు.