కామన్వెల్త్ క్రీడల్లో మీరాబాయికి స్వర్ణం
న్యూఢిల్లీ, జూలై26:
గ్లాస్గో వేదికగా జరుగుతున్న 2026 కామన్వెల్త్ క్రీడల్లో భారత వెయిట్లిఫ్టర్ మీరాబాయి చాను దేశానికి తొలి స్వర్ణ పతకాన్ని అందించింది. ఆదివారం జరిగిన మహిళల 48 కిలోల వెయిట్లిఫ్టింగ్ విభాగంలో అద్భుత ప్రదర్శన కనబరిచిన ఆమె అగ్రస్థానాన్ని కైవసం చేసుకుని స్వర్ణ పతకాన్ని సొంతం చేసుకుంది. టోర్నీకి ముందు ఆసియా క్రీడలే తన ప్రధాన లక్ష్యమని, కామన్వెల్త్లో శాతం వంద ప్రదర్శన ఇవ్వగలనో లేదో చెప్పలేనని వ్యాఖ్యానించిన మీరాబాయి.. చివరకు తన ప్రతిభతో అందరి అంచనాలను నిజం చేసింది. ఫైనల్లో నిలకడైన ప్రదర్శనతో ప్రత్యర్థులకు ఏమాత్రం అవకాశం ఇవ్వకుండా స్వర్ణాన్ని గెలుచుకుంది. దీంతో కామన్వెల్త్ క్రీడల్లో వరుసగా మూడోసారి స్వర్ణ పతకాన్ని సాధించిన ఘనతను మీరాబాయి చాను తన ఖాతాలో వేసుకుంది. 2018, 2022 ఎడిషన్లలోనూ స్వర్ణం గెలిచిన ఆమె.. గ్లాస్గోలోనూ అదే జోరు కొనసాగించి వెయిట్లిఫ్టింగ్లో తన ఆధిపత్యాన్ని మరోసారి నిరూపించింది. ఈ విజయంతో కామన్వెల్త్ క్రీడల్లో భారత్ పతకాల ఖాతాను స్వర్ణంతో ప్రారంభించడమే కాకుండా, భారత జట్టుకు మీరాబాయి చాను శుభారంభాన్ని అందించింది.
